2019 жылдың 4 сәуірінде Орталық коммуникациялар қызметінде «Қазақстан» телерадиокорпорациясының Digital платформадағы жаңа жобалары мен Димаш Құдайбергеннің 29 маусым күні Нұр- Сұлтанда өтетін "Arnau" концертіне арналған баспасөз конференциясы өтті.

Шара барысында «Қазақстан» РТРК АҚ басқарма төрағасы Ерлан Қарин «Kinomax» жаңа мобильдік қосымшасының іске қосылуы жайында және "Arnau" концертінің дайындық барысы жөніндегі жаңалықтарымен бөлісті.

Оның айтуынша: «Қазыр цифрландыру дәуірі, сондықтан көрермендердің көбісі әлуметтік желілерде, түрлі интернет сайттарда өздеріне қызықты да қажетті контентті тауып, тамашалай алады. Таңдау көп, сондықтан танымал трендтерге сәйкес келетін контент жасаушылар саны күннен күнге көбейіп келеді, бәсекелестік күшейе түсуде.Осы орайда«Қазақстан» корпорациясы заман талабына сай жұмыс жасауда. Өткен жылы «Qazaqstan tv» мобильдік қосымшасын іске қосқан болатынбыз, сол арқылы телеарналарымыздың жобаларын онлайн режимде көру мүмкіндігі пайда болды. Аздаған уақыттың ішінде қосымшаны жарты миллионнан астам қолданушы жүктеп алды.

Сондай-ақ әлеуметтік желілердегі жеке аккаунттарымызда жазылушылар саны 1 599 762 адамға жетті. Ал, «Qazaqstan tv» Youtube арнасының жазылушылар саны миллионға жетіп отыр, сондықтан қазіргі сәтте еліміздегі мемлекеттік телеарналардың ішінде ең алдыңғы орында тұр. Маусым айында «Youtub-тың алтын тетігін» иеленуіміз әбден мүмкін. Одан басқа, корпорациямызға қарасты барлық аккаунттар мен домендер Qazaqstan tv-ге ауыстырылды. Жастар жылы аясында Youtube арнамызда жастарға арналған ситком дайындап жатырмыз, ол туралы кейінірек білерсіздер.

Бүгін Сіздердің назарларыңызға ұсынып отырған «Kinomax» мобильді қосымшасы – бұл Andriod және IOS платформаларында тәулігіне 24 сағат бойы қолжетімді видеосервис. Осы қосымша арқылы отандық телехикаялар, көркем және деректі фильмдер, анимациялық фильмдерді онлайн режиммен қатар, оффлайн режимде де көруге болады.

Қосымшада:«Kinomax-тегі жаңа фильмдер» деген айдарда жаңадан енгізілген кинотуындылар жиналған, «Осы аптада танымал» бөлімінде қолданушылардың арасында танымал, жоғары бағаланған контент, ал «Дәл қазір көруде» - сол сәтте қолданушылардың тамашалап жатқан контентін көре аласыздар. Сонымен қатар, кішкентай бүлдіршіндер үшін «Балапан» режимі қарастырылған. Бұл топтамада «Балапан» телеарнасының бағдарламалары, анимациялық фильмдер ұсынылған.

Бұл видеосервис отандық контентті дамытумен қатар аудитория сұранысына сай сапалы жобаларды ұсыну мақсатында іске асырылды. Осы арқылы біз көрермендерімізге не қызықты екенін ескеріп, бәсекеге қабілетті және түрлі жанрлардағы контентті ұсынуды көздейміз»-деді.

Сонымен қатар, Ерлан Қарин «Қазақстан» корпорацияның ұйымдастыруымен өтетін Димаш Құдайбергеннің концертіне дайындық барысы жайлы мәлімет айтып өтті.

«Концертке билет сатып алушылардың ең көбі қазақстандықтар, одан кейін Ресей, АҚШ, Қытай, Ұлыбритания, Франция, Германия, Жапония, Түркия, Нидерланды, Румыния, Польша және т.б. Ең алыс елдердің арасында: Бразилия, Мексика, Африка, Канада, Австралия. Билеттер сатылымға шыққан алғашқы күні 6926 билет (30%)сатылған.Бір аптадан кейін билеттер сатылымы 11099-ға (48,2%) жеткен. Бүгінде сатылым 66%-ға жеткен, яғни 15156 билет сатылды. Димаштың концертіне келем деушілердің саны өте көп, үлкен аншлагпен өтеді.

Димаштың дауысы – бұл адамдардың жүрегін жаулап алатын, ерекше импульс, былай айтқанда «Kinetic Voice» (от греч. Kinetikos – қимылға әкелетін әрекет). Бұл Димаштың концертінің басты концепциясы. Шоу кинетикалық стильде құрылған, оның образына дейін имиджмейкерлермен кеңінен ойластырылған. Әр номер – ортақ идеяны жеткізетін жеке оқиға, мини-спектакль десе болады. Қазіргі сәтте барлық техникалық жағдайлар, мультимедиялық шешімдер, сахнаның әрленуі, дыбыс пен жарық мәселесі шешілді. Енді декорация мен реквизит қарастырылып жатыр. Концерттін тв нұсқасын сапалы түсіру жұмыстары да ойластырылуда, алдағы 3 айға жоспар құрылған.

Шығармашылық топ музыкалық материалдармен, қойылым жұмыстары мен графикалық шешімдер толық іске асырылып жатыр. Концертке қатысатын әр түрлі жанрдағы бишілер тобына арнайы кастинг жүргізілді. Кастинг қорытындысы бойынша халықаралық алаңдарда өнер көрсеткен еліміздің ең мықты бишілері қатысатын болды.

Тағы да бір жаңалықты айта кетейін, мамыр айының мерекелік күндерінде Ұлттық арнада Мәскеудегі Кремль сарайында 22 наурызда өткен Димаштың концерті эфирге шығады. Сондай-ақ, тағы бір тосын сыйымыз бар, біз Димаш туралы деректі фильмнің түсірілімін бастап кеттік, бұл туындыда Димаштың өмірі, шығармашылығы жайлы баяндалады. »- деп аяқтады Ерлан Қарин.

Барлық брифингтер туралы білгіңіз келеді ме?
Бізге жазылыңыз канал в Telegram!