Бұл туралы бүгін ҚР Экология, геология және табиғи ресурстар вице-министрі Ахметжан Пірімқұлов ҚР Президенті жанындағы Орталық коммуникациялар қызметінің алаңында өткен баспасөз конференциясында айтты.

Құжатты дайындау кезінде халықаралық экологиялық реттеу тәжірибесі, қауымдастықтардың, халықтың пікірі мен ұсыныстары есепке алынды. Жобадағы норманың бірі – «заңбұзушы жояды» міндетті қағидатының енгізілуі.

«Яғни, заң бұзушының экологиялық зардапты табиғи түрде жоюы, қайталанғаны үшін қызметін тоқтатуға дейінгі жауапкершілігі, жобалау компанияларының жауапкершілігі міндеттемесі енгізіледі», - деді вице-министр.

Экологиялық кодексті жетілдірудегі басты бағыттың бірі – «ластаушы төлейді» экологиялық қағидатын іске асыру.

«Бұл бағыт толықтай экологиялық реттеуден бас тартуды қарастырады. Толып жатқан табиғатты пайдаланушыны тәртіпке шақырмай-ақ, тек ірі ластаушы кәсіпорындарға көңіл бөлу қажет. Бұл ретте осы ірі кәсіпорындардың бәрін есепке алу үшін бұл санаттағылардың дәл санын анықтау қажет», - деп атап өтті.

Сондықтан жаңа Экологиялық кодексте мұндай талапты тек «Бірінші санаттағыларға» қатысты ғана қолдану ұсынылуда, осылайша, шын мәніндегі экологиялық қауіпті нысандарға ғана назар аударылады. «Бірінші санаттағы» компаниялар сондай-ақ өндіріске зиянды заттар шығарындыларын төмендететін «ең озық қолжетімді технологияларды» енгізуге тиіс.