Биылғы Елорданың 21 туған күнін мерекелеу аясында 100-ге жуық іс-шара өткізіледі, оның 73-і тегін. Бұл туралы Нұр-Сұлтан қаласы әкімінің орынбасары Ерлан Каналимов Орталық коммуникациялар қызметінде мәлімдеді.
«Елорда күнін мерекелеу аясында жыл сайын 300-ден астам іс-шара өткізілді, бірақ биылғы жылы шығыстарды оңтайландыру мақсатында мерекелік іс-шараларға арналған бюджет 3 есе қысқартылды», - деді Ерлан Каналимов.
Қысқартылған іс-шаралардың ішінде Қазақстан мен Ресейдің жұлдыздарының қатысуымен өтетін OPEN AIR, 6 шілдеде өтетін елорданың бас алаңдарындағы, ашық аспан астындағы гала-концерттер жатады.
Нұр-Сұлтан қаласы әкімінің орынбасарының айтуынша, мерекелік бағдарламаның айрықша ерекшелігі оның полиорталықтандырылуы және бұқаралық аудиторияға бағытталуы болып табылады.
«Биылғы жылы іс-шаралардың басты алаңы қала шетіндегі 8 саябақ, парктер, алаңдар, бульварлар және Есіл өзенінің жағалауы болады», - деп атап өтті.
