Алдағы апталарда қалаға тағы 165 оқушы келеді. Олардың қатарында Солтүстік Қазақстан, Батыс Қазақстан, Атырау және Қарағанды облыстарының балалары бар. Бағдарлама бойынша 23 шілде мен 26 тамыз аралығында бірнеше топтың сапары ұйымдастырылады.
Үш күн ішінде балалар елорданың тарихымен, мәдениетімен және көрікті жерлерімен танысады. Кәсіби гидтердің көмегімен олар «Бәйтерек» монументіне, Қазақстан Республикасының Ұлттық музейіне, Қазақстан теміржолының музейіне, Бейбітшілік және келісім сарайындағы «Леонардо да Винчи» көрмесіне және Астананың басқа да маңызды нысандарына барады.
Жоба ішкі балалар туризмін дамытуға, өскелең ұрпақты Қазақстанның тарихы, мәдениеті мен жетістіктерімен таныстыруға, сондай-ақ олардың елге деген мақтанышы мен Отанға деген сүйіспеншілігін арттыруға бағытталған.
