ҚР Тәуелсіздігінің 30 жылдығы аясында үшінші ұлттық халық санағы өтеді. Халық санағы БҰҰ жариялаған халық және тұрғын үй қоры санақтарын өткізу бойынша 2020 жылғы кезекті Дүниежүзілік раунды шеңберінде жүргізіледі. Қазақстанда Ұлттық халық санағын өткізу 2020 жылғы 1-30 қазан аралығында жоспарланған болатын, алайда мелекет басшысының тапсырмасымен елдегі COVID-19 пандемиясына байланысты 2021 жылға ауыстырылды. Орталық коммуникациялар қызметі алаңында өткен брифингте ҚР СЖРА Ұлттық статистика бюросының басшысы Нұрболат Айдапкелов халық санағын өткізу жайлы баяндады. Үкімет қаулысына сәйкес, халық санағы 2021 жылғы 1 қыркүйектен бастап 30 қазанға дейін өтеді.
«Халық санағының маңыздылығы, ол тек халықтың саны туралы деректер алып қана қоймай, кең көлемді нақты бір қысқа мерзімде ахуалды ақпарат жинауға мүміндік береді. Яғни, адамға байланысты, білім деңгейіне, денсаулығының жағдайына, некедегі жағдайына, жанұя құрылымына, жұмыс істеуі, табыс көзі, тұрғылықты жердегі үй жайына байланысты сұрақтарды қамтитын ақпарат жиналады», -деді Ұлттық статистика бюросының басшысы.
Оның айтуынша, жиналған ақпараттың негізінде демографиялық, экономикалық болжаулар жасап, елдің одан әрі дамуына қажетті ахуалды кең көлемді ақпарат базасы құрылады. Барлық ақпарат әрбір елді мекендер бойынша жиналады.