21 387 жетім баланың 17 600-ы қазақстандық отбасыларда тәрбиеленіп отыр. Жыл сайын Қазақстан азаматтары отбасына 1000-нан астам жетім баланы қабылдайды. ОКҚ дөңгелек үстелінде ҚР Оқу-ағарту министрлігі Балалардың құқықтарын қорғау комитетінің төрағасы Насымжан Оспанова атап өткендей, балалар үйлерін институттандыру жалғасып жатыр. 3 жылда олардың саны 21-ге азайды.
«Балаларды көшедегі, үйдегі және мектептегі қауіпті жағдайлардан қорғау – мемлекет басымдық беріп отырған міндет. Сондықтан балалар тұратын объектілерде бұрын-соңды болмаған кешенді қауіпсіздік шаралары жүзеге асырылуда. Мемлекеттік білім беру ұйымдарының 100%-ы бейнебақылау жүйелерімен қамтамасыз етілген, ЖБО-ға қосылған, лицензияланған күзетпен қамтамасыз етілген, дабыл түймелерімен жабдықталған. Министрлік үшін білім беру ұйымдарындағы қауіпсіз орта тек техникалық қауіпсіздік құралдарымен ғана шектеліп қоймай, балалардың эмоционалдық күйін де қамтиды. Достық, жауаптылық және өзара сыйластық дағдыларын қалыптастыру негізінде мектеп ортасында оң қарым-қатынастарды орнату үшін білім беру ұйымдарында «Досболlike» акциясы өткізілді. Енді «Досболlike» буллингке қарсы бағдарламасы еліміздің 8 өңірінің 50 мектебінде жүзеге асырылмақ», – деді спикер.
Мемлекет басшысының тапсырмалары аясында Оқу-ағарту министрлігі Ғылым және жоғары білім министрлігімен бірлесіп «Менің бауырым» еріктілер жобасын бастады. Жоба арқылы балалар дұрыс қарым-қатынас орнатуға, түрлі мәселені шешу үшін тіл табысуды үйренеді.
«Балаларды зорлық-зомбылықтан қорғау, суицидтің алдын алу және олардың құқықтары мен әл-ауқатын қамтамасыз ету жөніндегі 2023-2025 жылдарға арналған кешенді жоспар іске асырылуда, оған бірқатар маңызды бастама кірді. Өңірлік психологиялық қолдау орталықтарын дамыту бойынша жұмыс жүргізілуде, ол балалардың, ата-аналардың, сондай-ақ педагог-психологтардың кәсіби психологиялық көмекке қол жеткізуін қамтамасыз етуге мүмкіндік береді. Білім беру ұйымдары мен одан тыс жерлерде балалардың зорлық-зомбылыққа ұшырамауы, мұндай оқиғалардың алдын алу, анықтау және оларға көмек көрсету бойынша әдістеме қабылданды», – деп атап өтті ведомство өкілі.
Сондай-ақ Парламент Мәжілісінің депутаттары бірінші оқылымда «Қазақстан Республикасының кейбір заңнамалық актілеріне әйелдердің құқықтары мен балалардың қауіпсіздігін қамтамасыз ету мәселелері бойынша өзгерістер мен толықтырулар енгізу туралы» ҚР Заңының жобасында балалардың құқықтарын бұзғандарға жауапкершілікті күшейту жөніндегі шараларды мақұлдады.
Балалардың цифрлық сауаттылық деңгейін анықтау, балаларды цифрлық ортада қорғауға бағытталған іс-шараларды стратегиялық жоспарлау және іске асыру үшін министрлік ЮНИСЕФ-пен бірлесіп, 2023 жылы «Kazakhstan Kids Online. Қазақстандағы балалардың цифрлық өмірі» зерттеуін өткізді. Цифрлық технологияларды жауапты, қауіпсіз және нәтижелі пайдалануға назар аудару мақсатында ата-аналарды «Ата-ана бақылауы» және «КиберТұмар» бағдарламаларына қосу, балаларды цифрлық ортада қорғау науқандары басталды.
