Оның мәлімдеуінше, заң жобасы аясында кәсіби ойын спорты клубтарын ұстауға бөлінетін бюджет қаражатына лимит бекіту; Қазақстан Республикасының азаматтығын алмаған спортшыларды бюджет есебінен қаржыландыруға тыйым салу, «спорттың басым түрлері» ұғымын нақтылау, сондай-ақ олардың өңірлік тізбесін бекіту, аккредиттелген спорт федерациясына діни экстремизм мен терроризмнің алдын алу үшін шаралар қабылдауды міндеттеу, спорт федерацияларын аккредиттеу талаптарын белгілеу, «мүгедектігі бар спортшыны сүйемелдеуші» ұғымын енгізу және мемлекеттік дене шынықтыру және спорт ұйымдарының басшыларын ротациялау көзделген.
«Басты мәселелердің бірі – спорт саласына вертикальді басқару жүйесін енгізу мәселесі. Бүгінде республикалық аккредиттелген спорт федерацияларының жұмыстары да тыңдалды. Нәтижесінде 8 федерацияға жаңа басшылар тағайындалды. Министрлік жанынан өңірлік спорт басқармасы басшыларын келісу бойынша арнайы комиссия құрылды. Бүгінгі таңда комиссия отырысымен 11 өңірдің басқарма басшыларының кандидатуралары тыңдалып, келісілді», – деді спикер.
Сондай-ақ заңнама жобасына сәйкес көптеген заңға тәуелді актілер дайындалып жатыр. Мәселен, командалық спорт түрлері бойынша кәсіпқой спорт клубтарының қызметін қолдауға бөлінген бюджет қаражатын тиімді және ұтымды пайдалану мақсатында кәсіпқой спорт клубтарын ұстауға лимиттер белгіленеді.
