«Бір терезе» қағидаты бойынша жұмыс істейтін көшіп-қонушылардың қозғалысын есепке алудың бірыңғай ақпараттық жүйесі құрылуда

: 28.03.2025 _ 15:10; Жаңалықтар; ҚР Президенті жанындағы ОКҚ; ҚР Президенті жанындағы ОКҚ

Көші-қон процестерін реттеу жүйесін цифрландыру ЕХӘҚМ қызметінің басым бағыттардың бірі болып табылады. Осы орайда, «Migration.enbek.kz» порталы әзірленді, бұл келу мақсатына қарамастан Қазақстанға келетін шетелдік азаматтардың бірыңғай есебін, сондай-ақ көші-қон ағындарының мониторингі мен бақылауын қамтамасыз етуге мүмкіндік береді. Бұл туралы ҚР еңбек және халықты әлеуметтік қорғау вице-министрі Асқарбек Ертаев ОКҚ алаңында өткен баспасөз мәслихатында хабарлады.

Оның айтуынша, бұл жұмыс кезең-кезеңмен жүргізілуде. 2024 жылдан бастап жүйеге 15 қызмет енгізілді, 2025 жылы 3 қызметті іске қосу жоспарда бар.

«Осы шаралардың барлығы «Бір терезе» қағидаты бойынша жұмыс істейтін көшіп-қонушылардың қозғалысын есепке алудың бірыңғай ақпараттық жүйесін құруды көздейді. Жалпы, көші-қон саласында жүргізіліп жатқан жұмыстар Министрліктің тұрақты бақылауында», – деді вице-министр.

Жалпы, бүгінде көші-қон заңнамасын жетілдіру мақсатында министрлік заңнамалық бастамаларды әзірлеу бойынша жұмыс жүргізіп жатыр.