Ауқымды тұрғын үй құрылысын ынталандыру мемлекеттің тұрғын үй құрылысы салынатын аудандарға коммуникациялар тарту есебінен қамтамасыз етіледі. Осы мақсатта жыл сайын 130 млрд теңгеге дейін қаржы бөлу көзделген. Бұл туралы Орталық коммуникациялар қызметінде өткен брифингте ҚР ИИДМ Құрылыс және ТКШ істері комитетінің төрағасы Мархабат Жайымбетов хабарлады.

«Бұл қаржыға азаматтарға жеке тұрғын үй құрылысын салу үшін бөлінетін 40 мың жер учаскесіне коммуникация тартылады. Тұрғын үйді іске қосу көрсеткіші бүгінде бір тұрғынға шаққанда 0,71 шаршы метрге жетті. Бұл ТМД елдерінің ішіндегі ең жоғары көрсеткіш және экономикалық дамыған елдердің деңгейіне жақындады. Мысалы, тұрғын үймен қамтамасыз ету проблемасын қарқынды шешу кезеңінде Жапонияда жыл сайын бір адамға 0,9-1 ш.м. тұрғын үй, АҚШ-та - 0,7-0,8 ш.м., Франция мен Германияда - шамамен 0,7 ш.м. салынды, ал Қытай ұзақ уақыт бойы бір адамға 1 ш.м. деңгейінде құрылыс белсенділігін сақтап келеді. Бүгінгі таңда тұрғын үйге мұқтаж 530 мыңнан астам азамат кезекте тұр», - деді спикер бұл көрсеткіштердің Кезекте тұрғандардың бірыңғай республикалық базасынан алынғанын атап өтіп.

Биылдан бастап база мемлекеттік органдардың ақпараттық жүйелерімен интеграцияланған.