«2020 жылдың қорытындысы бойынша ірі қара мал басы 7,8 млн. басты құрады, бұл 2019 жылдың деңгейінен 5,6%-ға көп, қой мен ешкі басы 4,7%-ға, жылқы басы 10,1%-ға, түйе басы 5,2%-ға артты. Тиісінше мал шаруашылығы өнімдері – ет 4,3%-ға, сүт 3,2%-ға ұлғаюда. Нәтижесінде жалпы ауыл шаруашылығы өнімінің көлемі 2020 жылы 5,7%-ға артып, 6,3 трлн. теңгені құрады. Бұл Еуразиялық экономикалық одақ елдері арасындағы ең үлкен өсім. Тамақ өнімдерінің өндірісі 4%-ға өсті», - деді ведомство басшысы.
Ауыл шаруашылығының негізгі капиталына тартылған инвестициялар ағыны 15%-ға, тамақ өнімдері өндірісіне тартылған инвестициялар ағыны 13,5%-ға артты. Агроөнеркәсіптік кешендегі инвестициялардың жалпы көлемі 677,2 млрд. теңгені құрады, бұл жоспарлы мәннен үштен бірге артық. Өңделген ауыл шаруашылығы өнімдерінің экспорты 22%-ға артып, 1,3 млрд. АҚШ долларын құрады.