12.07.2022 _ 15:00

«Орталық – Оңтүстік» көлік дәлізіндегі жұмыстарды 2023 жылы аяқтау көзделген

Мемлекет басшысы автожол инфрақұрылымын дамыту өркендеудің басым бағыты болып қалатынын атап өтті. Президенттің тапсырмасымен, ең алдымен, құрылысы басталған «Алматы – Қарағанды», «Ақтөбе – Қандыағаш – Мақат» және Талдықорған – Өскемен магистральды бағыттардағы қайта жаңарту жұмыстарын уақытылы әрі сапалы аяқтау қажет. Бұл туралы ҚР ИИДМ Автомобиль жолдары комитетінің төрағасы Төлеген Абдуллин Орталық коммуникациялар қызметінде өткен дөңгелек үстелде мәлімдеді.

«Нұр-Сұлтан қаласынан Алматы қаласына дейінгі жалпы ұзындығы 946 шақырым болатын «Орталық – Оңтүстік» көлік дәлізінде ауқымды жұмыстар жүргізілуде. Қазіргі кезде жұмыстар Қарағанды мен Алматының арасындағы жолда жүргізіліп жатыр. «Нұр-Сұлтан – Қарағанды» жобасы аяқталды. Бүгінде І санаттағы жол пайдалануға берілді.  «Қарағанды - Алматы» жол учаскесі 4 бағытқа бөлінген: «Қарағанды-Балхаш», «Балхаш – Бурылбайтал», «Бурылбайтал - Құрты» және «Құрты-Қапшағай». Қазіргі уақытта жаңа асфальтбетон жабыны бойынша қозғалыс «Қарағанды – Балқаш» учаскесінің 227 шақырымында жүзеге асырылуда. «Балхаш – Бурылбайтал» жолында тиісті жұмыстар жалғасуда. Аталған көлік дәлізіндегі жұмыстар 2023 жылы аяқталады деп жоспарланған», - деді спикер.