Кездесу барысында Қазақстан мен Қытайдың құқық қорғау саласындағы, оның ішінде БҰҰ, ШЫҰ, АӨСШК және «Орталық Азия-Қытай» диалогы сияқты көпжақты құрылымдар шеңберіндегі ынтымақтастық мәселелері талқыланды.
Ш. Нұрышев сұхбаттасушыны Қазақстанда өтіп жатқан саяси және экономикалық өзгерістер туралы хабардар етті, сондай-ақ оны ү. ж. 1 қыркүйекте ҚР Парламентінің VII шақырылымының үшінші сессиясының ашылуында айтылған Президент Қасым-Жомарт Тоқаевтың Қазақстан халқына Жолдауының басты бағыттарымен таныстырды.
Сонымен бірге қазақстандық дипломат ҚР мен ҚХР арасындағы Азаматтық және қылмыстық істер бойынша құқықтық көмек көрсету туралы шарт шеңберінде екі елдің ынтымақтастығы мәселесіне ерекше назар аударды. Қазақстан Елшісі екіжақты қарым-қатынастарды дамытуға қосымша серпін беру мақсатында аталған құжатты одан әрі жетілдіру қажеттігін атап өтті.
Бұған қоса, Ш. Нұрышев ҚР мен ҚХР арасындағы Сотталған адамдарды беру туралы шарт аясында ҚР мен ҚХР-дың пенитенциарлық мекемелерінде жазасын өтеп жатқан екі елдің азаматтарын өзара беру мәселесінде тараптардың іс жүзіндегі өзара ықпалдасуын күшейтуді ұсынды.
Өз кезегінде, Бас прокурор Президент Қ.Тоқаев белгілеген ҚР-дағы саяси өзгерістерге, әсіресе еліміздің сот және құқық қорғау жүйесін реформалауға қатысты бағытқа жоғары баға берді.
Чжан Цзюнь озық тәжірибемен алмасу және прокуратура органдарының жұмысына жаңа «құралдарды» енгізу мақсатында Қытайдың Жоғарғы халық прокуратурасының ҚР Бас прокуратурасымен байланыстарды нығайтуға және тығыз диалог орнатуға мүдделілігін білдірді.
Кездесудің қорытындысы бойынша тараптар Қазақстанның Қытайдағы Елшілігі мен Қытайдың Жоғарғы халық прокуратурасы арасындағы өзара қызығушылық тудыратын өзекті мәселелер бойынша тығыз өзара іс-қимылды жалғастыруға уағдаласты.