Номиналы 900 теңгелік пошталық маркада 2003 жылы Қазақстан енгізген ЮНЕСКО-ның Дүниежүзілік мұра объектісі Қожа Ахмет Яссауи кесенесі бейнеленген. Суретші – француз иллюстраторы Николас Журну. Аталған марка 10 000 дана тиражбен шығарылады.
1992 жылы 22 мамырда Қазақстан Республикасы БҰҰ Бас Ассамблеясының 46-шы сессиясының пленарлық отырысында ЮНЕСКО-ға мүшелікке қабылданды.
Ұйыммен ынтымақтастықты ЮНЕСКО және ИСЕСКО істері жөніндегі ҚР Ұлттық комиссиясы үйлестіреді. Біздің мемлекет ЮНЕСКО қамқорлығымен 15 халықаралық конвенцияның тарапы болып табылады. «Әлем жады» деректі мұра тізіліміне 3 қазақстандық өтінім (Қожа Ахмет Яссауи мен оның шәкірттерінің қолжазбалары, «Невада-Семей» халықаралық антиядролық қозғалысының мұрағат материалдары, сондай-ақ «Арал теңізінің мұрағат қорлары») кірді, дүниежүзілік мұра тізімінде – 5 (Қожа Ахмет Яссауи кесенесі (2003 ж.), Таңбалы археологиялық ландшафттың петроглифтері (2004 ж.), Сарыарқа-Солтүстік Қазақстанның далалары мен көлдері (2008 ж.), Жібек жолы: Чаньань-Тянь-Шань дәлізі (2014 ж.), сондай-ақ Батыс Тянь-Шань (2016 ж.), материалдық емес мәдени мұра тізімінде – 13 («Ортеке», «Домбырада күй орындау өнері», «Қазақ күресі», «Асық ойыны», «Қазақ жылқышыларының дәстүрлі мерекелік көктемгі салт-дәстүрлері» ұлттық өтінімдері, Қырғызстанмен бірлескен «Киіз үй жасау дағдылары» және «Айтыс/Айтыш суырып салма өнері» номинациялары, сондай-ақ «Наурыз» көпұлтты өтінімдері (12 ел), «Сұңқар аулау» (24 ел), «Жұқа түркі наны» (5 ел), «Қорқыт мұрасы» (3 ел), «Тоғызқұмалақ» (3 ел), «Қожанасырдың әзіл әңгімелері» (7 ел), биосфералық резерваттар желісінде – 15, атаулы күндер күнтізбесіне 27 қазақстандық өтінім енді. Елімізде 5 ЮНЕСКО кафедрасы, 31 қауымдастырылған мектебі және 182 клубы жұмыс істейді.