Оның мәлімдеуінше, «АҚМОЛА» аймағының құрылуы – инвестиция тартудың негізгі құралы. Республикалық индустриялық аймақ инвесторлар үшін нағыз тартымды орталыққа айналып отыр.
«Онда жалпы құны 1 трлн теңгеден асатын жобалар жинақталды. Бұл 4 мыңнан астам жаңа жұмыс орнын ашуға мүмкіндік береді. Бүгінгі таңда астықты терең өңдейтін алғашқы зауыттың құрылысы басталды. Бұл – 1,8 млрд АҚШ доллары көлеміндегі инвестиция. Оның аясында жылына 3 млн тоннаға дейін астық өңдейтін зауыт салу жоспарланған. Маңыздысы, бұл жерде түпкілікті сұранысқа ие болатын тауарлар – натрий глутаматы, крахмал және минералды тыңайтқыштар өндіріледі. Сондай-ақ клинкер өнімдері мен қаптама кірпіш шығаратын және пестицид пен тыңайтқыштар өндіретін зауыттардың құрылысы жоспарланған. Осының барлығы – Астана агломерациясын дамытуға бағытталған ортақ жұмыстың бір бөлігі», – деді аймақ басшысы.
Қазан айында астықты терең өңдеудің екінші ірі кешенін салу жөніндегі стратегиялық негіздемелік келісімге қол қойылды. Инвестиция көлемі – 1,5 млрд АҚШ долларды құрап, онда 1000 жұмыс орны ашылады. Сондай-ақ биыл маңызды келіссөздер жүргізілді. Ірі инвесторлар бидай өңдеу мен жем өндіру, элеватор мен құрама жем зауытын, сондай-ақ асыл тұқымды репродуктор салу бойынша жобаларды жүзеге асыруды жоспарлап отыр. Жобалардың іске асырылуы 700-ге дейін жұмыс орнын құра отырып, шамамен 600 млн АҚШ доллары көлеміндегі инвестиция тартуға мүмкіндік береді.
Осы жылы «БЕНТ» компаниялар тобы «ҚАЗШПАЛ» кәсіпорнын сатып алды. Олар тәулігіне 3 мыңнан астам шпал шығару арқылы өндірісті қайта жаңғыртуға кемінде 10 млрд теңге инвестиция құяды. Бүгінгі таңда кәсіпорында 150 адам жұмыс істейді, келесі жылы бұл көрсеткіш 450-ге дейін жеткізілмек.