Қайта өңдеу саласының дамуына мемлекеттік қолдау маңызды рөл атқарады.
«Соңғы жылдары қаржылық қолдау құралдарының кешені айтарлықтай кеңейтілді. Қайта өңдеу кәсіпорындары үшін негізгі құралдарды сатып алуға 2,5% мөлшерлемемен жеңілдетілген кредиттер, ал айналым қаражатын қаржыландыруға 5% мөлшерлемемен кредиттер енгізілді. Кепілдік қамтамасыз ету жеткіліксіз болған жағдайда «Даму» қоры арқылы қарыз сомасының 85%-ына дейін кепілдік беру қарастырылған. Сондай-ақ инвестициялық субсидиялау шаралары кеңейтілді. Егер инвестицияларды өтеудің стандартты үлесі 25% болса, басым бағыттар үшін ол ұлғайтылды. Қант өндірісі мен жұмыртқа өңдеу үшін 40%-ға дейін, ал жоғары технологиялық өндірістер үшін 50%-ға дейін қарастырылған», – деді спикер.
Қабылданған мемлекеттік қолдау шараларының арқасында сала тұрақты оң динамиканы көрсетуде. Егер 2024 жылы негізгі ауыл шаруашылығы шикізаты бойынша қайта өңделген өнім үлесі жоспардағы 40% кезінде шамамен 50% болса, 2025 жылдың жедел деректері бойынша бұл көрсеткіш шамамен 60%-ға жетті.
Жалпы алғанда, қайта өңдеу өнеркәсібі агроөнеркәсіптік кешен өсімінің негізгі драйверлерінің біріне айналуда. Алдағы жылдары негізгі назар терең өңдеуді одан әрі дамытуға, өндірістік қуаттарды кеңейтуге, жоғары қосылған құны бар өнім өндірісін арттыруға және Қазақстанның әлемдік нарықтағы экспорттық позицияларын нығайтуға бағытталады.