Қазақстанда шағын және орта бизнес субъектілері белсенділігінің өсуі байқалады. Өткен жылмен салыстырғанда елімізде жұмыс істеп тұрған кәсіпкерлердің саны 18%-ға өсіп, 2 млн 41 мың кәсіпкер кәсібін өрге дөңгелетіп отыр. Орталық коммуникациялар қызметінің алаңында «Кәсіпкерлікті дамыту: мемлекеттік қолдау шаралары» деген тақырыптағы дөңгелек үстел барысында ҚР Ұлттық экономика министрлігі Кәсіпкерлікті мемлекеттік қолдау және қорғау департаментінің директоры Нұрбол Жанабеков осындай мәлімет келтірді.
Оның дерегіне сәйкес, ШОБ субъектілерінің өнім шығару көлемі өткен жылмен салыстырғанда 23%-ға өсіп, 28,7 трлн теңгені құраған.
«Шағын және орта кәсіпте жұмыспен қатылған халықтың саны 13,5%-ға өскен, 4 млн 272 мыңнан астам адам осы шағын және орта бизнесте жұмыс істеуде. Мұндай көрсеткіштерге жүргізіліп жатқан мемлекеттік, қаржылық және қаржылық емес бағдарламалар өз ықпалын тигізуде. Ол бағдарламаларды салалық мемлекеттік органдар және операторлар жүзеге асырады», – деп мәлім етті спикер.
