Жеңілдікті қарыз 20 миллион теңгеге дейінгі сомаға 5%-бен беріледі. Бастапқы жарна 19 жылға дейінгі мерзіммен қарыз сомасының 10%-ын құрайды.
Тұрғын үйді бастапқы және қайталама нарықта сатып алуға болады.
Жұмыс істейтін жастар үшін ипотека беру бастамасын Қарағанды облысының әкімдігі "Отбасы банкпен" бірлесіп алға тартты. Облыстық бюджеттен 1 млрд теңге бөлінді, "Отбасы банк" 500 млн береді.
Ипотека кемінде бір жыл ресми жұмыс істеген 35 жастан аспаған қарағандылықтарға қолжетімді. Табыс та ескеріледі. Отбасының әрбір мүшесіне ол 6 ең төменгі күн көру деңгейі (1 ЕТККД – 37 389 теңге) мөлшерінен аспауы тиіс. Сондай-ақ бағдарламаға қатысушы мен отбасы мүшелерінің соңғы 5 жыл ішінде меншігінде жылжымайтын мүлік болмауы тиіс.
Қатысушыларды комиссия іріктейді. Оның құрамына мемлекеттік органдар, депутаттық корпус және қоғам өкілдері кірді.
– Бағдарламаның механизмі өте қарапайым, – дейді жастар саясаты басқармасының басшысы Біржан Әлімжанов. – Бірінші кезекте әлеуетті қатысушылар қалалық әкімдіктің фронт-кеңсесіне жүгініп, тиісті құжаттар тізбесін тапсыруы қажет. Осыдан кейін комиссия балдық жүйе негізінде банкте біліктіліктен өтуге жолдама берілетін қатысушылардың тізімін жасайды. Бұл өтініш берушінің несие тарихы, төлем қабілеттілігі деңгейін жан-жақты зерттеу. Банк тарапынан оң шешім қабылданған жағдайда қарыз алушы ресімдеу процесіне көшеді. Іріктеу кезіндегі негізгі өлшемшарттар – еңбек өтілі, балалар саны және әлеуметтік осал санаттарға кіру.
Өтінімдер 24 маусымға дейін мына мекен-жай бойынша қабылданады: Нұрсұлтан Назарбаев даңғылы, 39А (Open Qarağandy фронт-кеңсесі).
Бағдарламаның толық шарттарымен Қарағанды облысының жастар саясаты мәселелері басқармасының, Қарағанды қаласы әкімдігінің, "Отбасы банк" АҚ сайтында, сондай-ақ jasprokrg_bot телеграм-ботында танысуға болады.
