Президенттің кез келген Жолдауы орташа және ұзақ мерзімге берілген стратегиялық міндеттердің жиынтығы болып табылады. Бұл Жолдаудың аясында Жол картасын жасау мүмкін емес, Президент негізгі мәселелердің басын ашып, оларды шешу жолдарын көрсетіп кетті. Енді ары қарай оның қаншалықты тиімді жүзеге асырылатыны оны жүзеге асыратын топтың еншісінде. Экономикалық зерттеулер институтының Тұрақты даму мақсаттары жөніндегі Хатшылықтың директоры Бақытгүл Хамбар Орталық коммуникациялар қызметі алаңында Мемлекет басшысы Қ.Тоқаевтың Қазақстан халқына Жолдауын талқылауға арналған сарапшылар отырысында осындай пікірін білдірді.
«Жолдауда тұрақты дамудың негізі айтылды. Оның қағидасы ешкімді назардан тыс қалдырмау керек. Жөргектегі баладан зейнеткерге дейін бәрінің мүддесі айтылды. Бұл Жолдаудың негізгі ерекшелігі. Жол мәселесі де көтерілді. Жергілікті жерлерде жағдайы жақсы жолдарды 95% жеткізу керек. Бұл өзекті мәселенің, әлеуеттік, экономикалық маңызы бар. Сондай-ақ қауіпсіздік жағынан да маңызды. 2021 жылдың басындағы статистикаға сүйенсек, қанағаттанбайтын жолдардың үлесі 65% жуық елді мекендер бар, бірақ оның үлесі 6 пайызды ғана құрайтын елді мекендер де бар. Ең әуелі шалғай жатқан елді мекендердегі мәселе шешілсе, бұл тауар бағасының қымбатшылығына, адамдардың әлеуметтік жағдайына әсерін тигізеді деп ойлаймын», - деді сарапшы.
Брифингтерден хабардар болғыңыз келе ме?
Біздің Telegram каналға жазылыңыз!