«Осындай авариялардың бірі өткен жылдың қараша айында «АрселорМиттал Теміртау» АҚ Ленин атындағы шахтасында орын алып, салдарынан 9 адам зардап шегіп, оның бесеуі қайтыс болды. Осыған ұқсас жағдай 2021 жылғы қарашада «Абай» шахтасында орын алып, 9 адам зардап шекті, оның алтауы көз жұмды. Осындай авариялардың алдын алу мақсатында «АрселорМиттал Теміртау» АҚ-да ҚР Үкіметі қол қойған Өзара түсіністік туралы меморандум шеңберінде бекітілген Жол картасын іске асыру жалғасуда, ол бірлескен күшпен кәсіпорынның өндірістік объектілеріндегі құқықтық тәртіпті нығайтуға және қауіпсіздік жағдайын жақсартуға мүмкіндік береді», – деді ТЖМ өкілі.
Сонымен қатар 231 оқыс оқиға тіркелді. Аварияларды тергеп-тексеру нәтижесінде олардың қауіпті өндірістік объектілер жұмыскерлерінің өнеркәсіптік қауіпсіздік талаптарын бұзуға жол берген немқұрайлылығы, сондай-ақ пайдаланылатын жабдыққа техникалық зерттеп-қараудың сапасыз жүргізілуі салдарынан болғаны анықталды.
