Жыл сайын құрылыс мамандықтарына 8 мыңға жуық адам түседі, түлектердің 60-65%-ы жұмысқа орналасады.
«Бүгінде колледждерге академиялық дербестік бердік, бұл жұмыс берушілермен бірлесіп кәсіптік стандарттар мен нарық талаптары негізінде білім беру бағдарламаларын әзірлеуге мүмкіндік беретінін атап өткен жөн. Сондай-ақ, кәсіпорындардың өтінімдері бойынша кадрларды нысаналы даярлау басталды. 2022 жылы кәсіпорындардың өтінімдері бойынша барлығы 7 727 адам қабылданды, оның ішінде 2 250 адам құрылыс мамандықтары бойынша. Жалпы, кадрларды нысаналы даярлау көлемі жыл сайын 10 мың талапкерге дейін ұлғаяды» – деп атап өтті вице-министр Еділ Оспанов.
Бүгін Оқу-ағарту министрлігінің мүдделі мемлекеттік органдардың, салалық қауымдастықтардың өкілдерімен, құрылыс саласы кәсіпорындарының басшыларымен, жергілікті атқарушы органдармен және техникалық және кәсіптік білім беретін ұйымдар басшыларымен еліміздің құрылыс саласын білікті кадрлармен қамтамасыз ету мәселелері жөніндегі бірлескен отырысы өтті.
Талқылауға Индустрия және инфрақұрылымдық даму, еңбек және халықты әлеуметтік қорғау министрліктерінің, Еңбек ресурстарын дамыту орталығының, «Атамекен» ҰКП, салалық қауымдастықтардың өкілдері мен жұмыс берушілер де қатысты. Кеңесте еңбек жағдайлары, студенттерді дуальды оқытумен қамтуды арттыру және жас мамандарды қолдау шаралары мәселелері көтерілді.
Осы тұрғыда, Оқу-ағарту министрлігі жанынан тиісті шешімдерді әзірлеу және қабылдау мақсатында кадрларды даярлау жөніндегі өзекті мәселелерді талқылау үшін диалог алаңы құрылады.
