Спикер атап өткендей, алдағы ШЫҰ саммитіне ұйымға мүше мемлекеттердің басшыларынан басқа, бақылаушы елдердің - Беларусь, Иран, Моңғолия елдерінің президенттері қатысады деп күтілуде. Түрікменстан президенті төрағалық етуші елдің қонағы болады. Сондай-ақ БҰҰ, ЕАЭО комиссиясы, ТМД, ҰҚШҰ, Оңтүстік-Шығыс Азия мемлекеттері қауымдастығының, АӨСШК құрылымдарының атқарушы органдарының басшылары қатысады.
Көпжақты ынтымақтастықты одан әрі дамытудың жай-күйі мен перспективаларын қарастыру, ШЫҰ қызметін ұлғайту жөніндегі басым және практикалық шараларды айқындау жоспарлануда.
«Негізгі құжат Дели декларациясы болады, онда өзекті халықаралық проблемаларды бағалау және мүше мемлекеттердің көпжақты ынтымақтастық жөніндегі алдағы қадамдары көрсетіледі», – деді спикер.
Рәсімге сәйкес ШЫҰ-ға мүше мемлекет мәртебесін алу мақсатында Беларусь Республикасының міндеттемелері туралы Меморандумға қол қойылады. ШЫҰ сыртқы байланыстарын кеңейту шеңберінде ШЫҰ Хатшылығы мен БҰҰ-ның Қоршаған ортаны қорғау жөніндегі бағдарламасы арасында Меморандумға қол қою туралы шешім бекітілетін болады.
«Алматыға 2023-2024 жылдардағы ШЫҰ-ның туристік және мәдени астанасы мәртебесін беру бойынша арналған шешім қабылдау жоспарлануда. Алматы әкімдігі мен Мәдениет және спорт министрлігі ұйымға мүше мемлекеттердің мәдениет және өнер өкілдерін шақыра отырып, іс-шаралар жоспарын дайындады», – деді М. Мұқышев.
Ұлттық үйлестірушінің айтуынша, еліміздің ШЫҰ желісі бойынша төрағалық ету кезеңіне 80-ге жуық іс-шара жоспарланған. Соңғы кезең 2024 жылдың шілдесінде Астанада өтетін ШЫҰ саммиті болмақ.
