Денсаулық сақтау вице-министрі Айжан Есмағамбетова түсіндіріп өткендей, бақылаудың екі түрі бар: біріншісі – нысанның қызметіне рұқсат беру үшін бақылау, екіншісі – жұмыс істеп тұрған нысанға бару. 

Әр лагерь өз жұмысын бастамас бұрын санитарлық-эпидемиологиялық қорытынды алуға тиіс.

«Биыл Денсаулық сақтау министрлігінің аумақтық бөлімшелеріне 200-ге жуық өтініш келіп түсті, оның ішінде 170 қорытынды алды, 30 шаруашылық жүргізуші субъектіге санитарлық нормалар мен ережелерге сәйкес келмеуіне байланысты рұқсат берілген жоқ. Осы кезеңде біз объектінің сәйкестігін қарастырамыз: ғимараттың, жиһаздың, сумен жабдықтаудың, кәріздің және т.б. болуы, бірақ бұл кезеңде объект жұмыс істемейді және оның қызметін - тамақтану, демалу, медициналық қызмет көрсетуін тексеру мүмкін емес. Нысан жұмысының барысын жоспардан тыс тексерулер барысында ғана көруге болады», – деп нақтылады спикер.

Бүгінде әлеуметтік желілерде лагерьлердің қызметіне қатысты жағымсыз ақпараттың таралуына байланысты прокурорлар барлық лагерьлерді тексеру бастамасын көтерді.

«Барлық аумақтық департаменттер осы тексерулерге қатысады. 170 лагерь тексеруге жатады. Оның 19-ы бойынша тексерулер аяқталды. Қалғандары бойынша тексеру жалғасуда», – деді А. Есмағамбетова. 

Анықталған бұзушылықтардың ішінде рұқсат алу кезінде мәлімделген объектінің қуатын бұзу (атап айтқанда, бір ауысымда санитариялық-эпидемиологиялық қорытындыны алған кезде көрсетілгеннен көп балаға қызмет көрсету), сумен жабдықтауды, кәрізді, тамақтандыруды ұйымдастыруды, персоналды медициналық тексеруді қамтамасыз етуге байланысты бұзушылықтар бар.

«Тексеру нәтижелері бойынша өндіріп алу шаралары қабылданады», – деді спикер.  

Бұл ретте денсаулық сақтау вице-министрі бақылаудың жаңа нысандарын енгізу ұсынылған заң жобасы Мәжіліске жіберілгенін айтты.

«Бұл бармай-ақ тексеру және барып тексеру. Тергеу түріндегі бақылау нысаны енгізілмек. Жедел ден қою сияқты бақылаудың жаңа түрі пайда болады. Халықтың денсаулығының нашарлауына немесе өміріне зиян келтіруі мүмкін санитарлық нормалар мен ережелерді бұзу фактілері анықталған жағдайда, бізге олардың қызметін дереу тоқтатып қою құқығы беріледі», – деп түйіндеді А. Есмағамбетова.