Авариялық-құтқару іс-шараларына 4 мыңнан астам қызметкер мен әскери қызметшілер, ведомстволық академиялардың курсанттары, сондай-ақ полиция ведомствосының 700-ге жуық техникасы жұмылдырылған. Бұл -патрульдік автокөліктер, қызметтік автобустар, Камаздар, Оралдар, 2 тікұшақ және 2 ұшақ.
«10 мың метрден астам арық тазартылды. Суды бөгеу үшін 144 мыңнан астам қап төселді. 12,6 мың адам эвакуацияланды. Оның ішінде 300-ге жуығы тікұшақпен шығарылған. Зардап шеккен елді мекендердің саны 50-ге дейін өсті. Қазір полицияның қорғауында 9 135 тұрғын үй және басқа да нысандар бар. Тонауға жол берілмейді. Азаматтардың қауіпсіздігі үшін 80 ірі уақытша орналастыру пункті ұйымдастырылды»,-деді спикер.
Республикалық маңызы бар жолдардың 14 учаскесінде жүріске шектеу енгізілген. Су басқан аймақтардан полицияның арнайы ұйымдасқан колоннасымен 5 мың автокөлік шығарылды. Сондай-ақ 70 ауыз сумен жабдықтау объектісі және 91 су шаруашылығы стратегиялық объектілерін қорғау қамтамасыз етілуде.
Бүгінгі таңда су тасқынына қарсы іс-шараларға барлық қызметкерлер мен әскери қызметшілер жұмылдырылды. Жағдай нашарласа, басқа өңірлерден қосымша күштер мен құралдар тартылатын болады.
