Оның айтуынша, оң сальдо білім деңгейі бойынша да байқалады, елден шыққан адамдарға қарағанда елімізге білімді адамдар көптеп келген. Бұдан бөлек, техникалық мамандықтар бойынша +1597 адам, педагогикалық мамандықтар бойынша +526 адам, ауыл шаруашылығы мамандықтары бойынша +151 адам, медициналық мамандықтар бойынша +295 адам оң сальдо қалыптасты.
Сондай-ақ вице-министр ішкі көші-қонда еңбек мобильділігі шеңберінде белсенділіктің өсуі байқалатынын атап өтті.
«Ел шегінде қоныс аударушылар саны өткен жылдың сәйкес кезеңімен салыстырғанда 1,5 есе өсті. 2024 жылы ішкі көші-қонға 1 млн 510 мың адам қатысты, оның ішінде 689,5 мыңы облысаралық қоныс аударуға қатысты. Мегаполистер ішкі мигранттарды тарту орталықтары болып қала береді. Мәселен, қарастырылып отырған кезеңде Астана қаласына тұрақты тұруға 151 мыңнан астам адам, Алматы қаласына – 129 мың адам, Шымкент қаласына– 68 мың адам келді», – деп қосты Асқарбек Ертаев.
Бұдан әрі вице-министр Көші-қон саясаты тұжырымдамасын іске асыру аясындағы жұмыстың негізгі бағыттары туралы хабарлады. Мәселен, қазақстандық жұмыскерлердің білімін трансферттеу және біліктілігін арттыру мақсатында сұранысқа ие шетелдік мамандарды тарту бойынша бірқатар кешенді шара қабылдануда. Ол үшін министрлік бұйрығымен шетелдіктердің Қазақстанда тұрақты тұруға рұқсат алуы үшін талап етілетін кәсіптердің тізбесі 30 мамандықпен толықтырылды. Мысалы, 2024 жылы тұрақты тұруға негізінен ІТ саласында сұранысқа ие кәсіптер бойынша 72 рұқсат берілді.
Қазақстан азаматтарының бәсекеге қабілеттілігін арттыру мақсатында қазақстандық қызметкерлердің тәлімгерлігін ұйымдастыру қағидалары және шетелдік жұмыс күшін тартатын жұмыс берушілерге қойылатын талаптар бекітілді.
Жеке тұлғалардың үй шаруашылықтарында жұмыс істеу үшін еңбекші көшіп келушілерге рұқсат беру тәртібі қайта қаралды. Жеңілдікті режиммен тарту үшін шетелдік қызметкерлердің санын анықтау бойынша бизнес-процесс автоматтандырылды.
