Оның айтуынша, ең алдымен, көрші елдермен белсенді келіссөздер жүргізілуде. Министрлік қызметкерлері Ресей, Қытай, Қырғызстан және Өзбекстанмен су тасқыны туралы үнемі ақпарат алмасып отыр. Ресеймен күн сайын тасқын суды өткізу, гидроқұрылыстар мен су объектілерінің жай-күйі туралы ақпарат алмасады. Тараптар су тасқыны аяқталғанға дейін дерек алмасады.
«Қытаймен ынтымақтастық аясында трансшекаралық өзендердегі табиғи апаттар туралы шұғыл хабарлау туралы келісім бар. Сондай-ақ біздің мамандар Сырдария өзені бассейні бойынша өзбекстандық әріптестерімен үнемі байланыста. Қырғызстанмен де Шу және Талас өзендері бойынша келіссөз жүргізіліп жатыр», – деді спикер.
Ресми өкіл су тасқыны кезеңіндегі ел ішіндегі жұмысқа да тоқталып өтті. Су ресурстары және ирригация министрлігі тасқын суды гидротехникалық құрылыстар арқылы қауіпсіз өткізуді қамтамасыз етеді және оны өзен-көлдерге, табиғи жайлымдар мен шабындық жерлерге бағыттау үшін су қоймаларына жинайды. Былтыр тасқын суды сауатты бөлудің нәтижесінде қоймалар суға толтырылды, шаруаларға қажет көлемде су жиналды және дихандар суармалы сумен толық қамтамасыз етілді.
«Батыс Қазақстан облысындағы көлдер жүйесіне тасқын су жіберіле бастады. Атап айтқанда, облыстағы «Қазсушар» филиалы Пятимар су қоймасынан Көшім өзенінің төменгі ағысында орналасқан көлдерге су жіберуде. Қалған өңірлер әзірге су жинау режимінде жұмыс істеп жатыр», – деді М.Әбдуалиева.
1 ақпаннан бері бүгінгі күнге дейін еліміздің су қоймаларына 1,7 млрд текше метр тасқын су жиналды. Су нысандарының үздіксіз жұмысын қамтамасыз ету үшін «Қазсушар» филиалдары өңірлерде 1000 шақырымнан астам каналда механикалық тазарту жұмысын жүргізді. 230 гидроқұрылым жөндеуден өтті.
Батыс Қазақстан облысында Киров су қоймасы 58 жылда алғаш рет қайта жаңартылды. Бүгінгі таңда Үлкен және Кіші Өзен өзендерінде су қоймаларын салу және Бітік, Дөңгелек және Пятимар су қоймаларын реконструкциялау жұмысына дайындық жүргізіліп жатыр.
