ІІМ өз тарапынан тұрақты негізде жедел профилактикалық іс-шараларды және құқық қорғау бағытындағы акцияларды жүргізеді. Мысалы, «Балалар - түнгі қалада» іс-шарасы барысында түнгі уақытта көшеде және ойын-сауық мекемелерінде мақсатсыз жүрген балалар анықталып, ата-анасы жауапкершілікке тартылады.
«Биыл 7-9 маусым аралығында елімізде «Жасөсіріп» жедел профилактикалық іс-шарасын өткізу жоспарланған. Оның мақсаты – жасөспірімдер арасында құыққ бұзушылықты болдырмау», – деді ІІМ өкілі.
Ол жазғы кезеңде балалардың үйден тыс жерде көп уақыт өткізетініне байланысты әрбір өңірде жазғы демалыс кезінде кәмелетке толмағандар арасындағы құқық бұзушылық профилактикасы жөніндегі іс-шаралар іске асырылып жатқанын айтты. Бұл шаралар кәмелетке толмағандарға алкоголь мен темекі бұйымдарын сату фактілерін анықтауға, олардың ойын-сауық мекемелерінде және түнгі уақытта көшелерде жүруіне, сондай-ақ балалардың жаппай демалу орындарында қоғамдық тәртіпті сақтауын қамтамасыз етуге бағытталған.
«Кәмелеттік жасқа толмаған балалар ойын сауық орындарында сағат 22.00-ге дейін болуына болады. Ал тұрғын үйлерден тыс жерлерде сағат 23.00-ге дейін болуына рұқсат беріледі. Осы талаптар бұзылған кезде Әкімшілік құқықбұзушылық туралы кодекстің 442-бабының 1-бөлігіне сәйкес бала ойын-сауық орталығында жүрсе, ата-анасына 3 АЕК мөлшерінде айыппұл салынады немесе түнгі уақытта үйден тыс жерде жүрсе ата-анасына ескерту жасалады», – деді Ә. Оспанов.
Өз кезегінде дөңгелек үстелге қатысқан ТЖМ Өртке қарсы қызметі комитетінің төрағасы Нұрболат Дербісов балалар тәрбиеленетін барлық мекемелерде интерактивті сабақтар мен түсіндіру жұмыстары, оқу-жаттығулар жүргізілетінін атап айтты. Сонымен қатар ТЖМ балалар арасында судан қорғау, сейсмикалық қауіпсіздік бойынша да шараларды қолға алған.
