ҚР Ұлттық ұланының академиясы 4,5 мыңға жуық офицер даярлады

: 27.02.2025 _ 12:20; ОКҚ баспасөз іс-шаралары; ҚР Президенті жанындағы ОКҚ; ҚР Президенті жанындағы ОКҚ

Ұлттық ұлан әскерлерін даярлау Петропавл қаласында ҚР Ұлттық ұланының академиясында жүзеге асырылады. Академия әскери педагогиканың заманауи әдістеріне негізделген жоғары білім беруді қамтамасыз етеді. 1997 жылдан бастап Академия 4,5 мыңға жуық офицерді даярлады. Олардың ішінде 49 түлек «алтын» медаль, 305 түлек «үздік» деген диплом алды. Олар Ұлттық ұлан бөлімдері мен басқа да әскери ведомстволарда табысты қызмет атқарып жүр. Бүгінгі таңда 400-ден астам түлек түрлі құрылымда қызмет етеді. Мысалы, Қорғаныс министрлігі, ІІМ, ТЖМ, ҰҚК Шекара қызметі мен Мемлекеттік күзет қызметінде. Бұл туралы Ұлттық ұлан Бас қолбасшылығының Оқу және ғылыми жұмыс бөлімінің бастығы полковник Арман Әлібеков ОКҚ алаңында хабарлады.

«Ұлттық ұлан академиясы командалық-тактикалық бағыты бойынша бакалавриатта 9 мамандық дайындайды. Олар: Ұлттық ұлан, Тәрбие және әлеуметтік-құқықтық жұмыс, Зымыран артиллериялық қару-жарақ, Әскерлерді автомобильмен қамтамасыз ету, әскерлерді инженерлік-техникалық қамтамасыз ету, Байланыс әскерлері, Тылды қамтамасыз ету, Әскери барлау және Әскери педагогика бойынша. Ал, магистратурада «Әскери тәрбиелеу және оқыту» мамандығы бойынша даярлайды», – деді спикер.