2019 жылдың 3 сәуірінде Орталық коммуникациялар қызметі алаңында «Хабар» Агенттігі және «Telemasters.kz» телекомпаниясы «Central Asia’s Got Talent» (Орталық Азия таланттарды іздейді) телевизиялық жобасына іріктеу кезеңінің басталғанын баспасөз-конференциясында мәлімдеді. Баспасөз-конференциясына «Хабар» Агенттігі» АҚ Басқарма төрағасының бірінші орынбасары Ринат КЕРТАЕВ, «Central Asia’s Got Talent» шоуының бас продюсері Серік АКИШЕВ, Zoʻr TV телеарнасының продюсері Тимур АЛИЕВ, КТРК Телерадиотарату корпорациясының продюсері Қанатбек ҚҰЛТАЕВ, «ТВ Сафина» телеарнасының халықаралық байланыс бөлімінің басшысы Наргиза ҚАСЫМОВА.
Шоуға жас ерекшелігі мен талантының түріне қарамастан Орталық Азия елдерінің (Қазақстан, Өзбекстан, Қырғызстан, Тәжікстан) кез келген өнерлі адамы қатыса алады. Байқау жеңімпазы кең танымалдылыққа және қомақты қаржылай сыйлыққа ие болады.
Got Talent – Fremantle британдық компаниясының форматы. Авторы Саймон Коуэлл. 2006 жылы маусым айында аталмыш телебайқау «America’s Got Talent» деген атпен Америкада жарыққа шықты. Осы уақытқа дейін лицензия арқылы формат әлемнің 70 елінде жүзеге асырылған. 2014 жылдың сәуір айында Got Talent әлемдегі ең сәтті телевизиялық формат ретінде Гиннесстің рекордтар кітабына енді. Дәл сол кезде телебайқаудың франшизасы әлемнің 58 елінде көрсетілген.
Жоба - Қазақстан, Өзбекстан, Қырғызстан және Тәжікстан елдерінің азаматтарына арналған. Жоба 5 кезеңнен тұрады. Іріктеу, ашық тыңдалым, ширек финал, жартылай финал және ақтық финал. Бірінші кезеңде жобаға қатысушылардың өтініштері қабылданып, әрі қарай төрт елде іріктеу кезеңі өткізіледі. Жобаның бас жеңімпазынан бөлек, төрт елден жеңімпаз анықталып, ақшалай сыйлыққа ие болады. Central Asia’s Got Talent шоуы төрт елде «Хабар», «Zoʻr TV», «КТРК» және «ТВ Сафина» телеарналарынан көрсетіледі.
«Қазақстандық телевизия саласында алғаш рет барлық талантты адамдарды бір алаңға жинамақпыз. Отандық арналарда бұған дейін ән, би, спорт және т.б. өнер бәйгелері өткен болатын. Ал, бұл байқауда кез келген дарынды адам өзінің бағын сынап көреді. Сондай-ақ жобаның тағы бір ерекшелігі, Орталық Азия елдеріне ортақ шоу болады, яғни бағдарламаға қазақстандықтармен бірге Өзбекстан, Қырғызстан және Тәжікстан мемлекеттерінің азаматтары да қатыса алады. Біздің басты мақсатымыз – өнерлі адамдарды іздеп, олардың бүкіл Орталық Азия мемлекеттеріне танылуына мүмкіндік беру» - дейді «Хабар» Агенттігі» АҚ Басқарма төрағасының бірінші орынбасары Ринат Кертаев.
Сонымен қатар баспасөз-мәслихатында «Central Asia’s Got Talent» жобасы аясында Қазақстан, Өзбекстан, Қырғызстан және Тәжікстан елдері арасында әріптестік байланыс орнату жөнінде меморандумға қол қойылып, ресми түрде іске қосылды.
Жобаға қатысу үшін Орта Азия азаматтары +7 700 600 24 24 ортақ номеріне хабарлама жолдау, сондай-ақ әлеуметтік желілердегі жобаның ресми парақшаларына хат жазып, өтініш білдіру арқылы қатысады (@centralasiagottalent). Сонымен қатар іріктеу тобы офф-лайн режимде де жұмыс істейді. 2019 жылдың қыркүйек айында Central Asia’s Got Talent шоуының тұсауы кесіледі. Ал 2019 жылдың желтоқсанында Гранд Финал өтеді.
Қосымша ақпараттар үшін төмендегі мекен-жайға хабарласуыңызды сұраймыз
pr@khabar.kz, 8 7172 553 553 www.khabar.kz| facebook.com/ KhabarTV | vk.com/ KhabarTV | twitter.com/KhabarTV | Instagram.com. KhabarTV
