Қала бойынша депутаттар, қоғам белсенділері және жастардың қатысуымен Жайық жағалауындағы «Жастар паркінен» бастап, облыстық әкімдік ғимаратына дейін тазалау жұмыстары жүргізілді. Акция аясында белсенділер қаладағы жағалау бойын 160 тонна топырақ пен қапшықтан тазартты.

Атырау облысы «Жастар Рухы» Жастар қанаты облыстық филиалының төрағасы Абылай Құрметұлының айтуынша, бұл акция жастарды ортақ мақсатқа біріктіруге септігін тигізеді.

Бүгінде жастарды туған өлке табиғатын таза ұстауға шақыру біз үшін аса маңызды. Бұл акцияға ересектерді, жастармен қатар балаларды да жұмылдырылды. Біздің «Таза Қазақстан» акциясына қатысып, белсенділік танытуымыз өзге облыстарға үлгі боларына сенім мол, - деді А.Құрметұлы.

Акция барысында мақаттықтар Жастар орталығынан бастап кенттің кіреберісіне дейінгі аумақта дамылсыз жұмыс жасап, төңіректі көшелерді бойлай өскен шөптерден тазартты. Ең көп қоқыс жинаған үздік қатысушылар анықталды. Ұйымдастырушылар «Таза жағалау», «Таза ауыл», «Таза аула», «Таза көшелер» аталымдары бойынша жеңімпаздарды анықтады.

Индердегі акцияға жиналғандар Индербор кентінің шығыс бетіндегі 16 гектар аумақты алып жатқан ДСУ полигонындағы қоқысты сұрыптауға атсалысты. Сенбілікке жиналғандар күннің ыстығына қарамастан, ұйымшылдықпен еңбек етті.

Махамбет пен Исатай халқы тұрғындар тынығатын саябақтарды, ал Қызылқоғаның табиғат жанашырлары «Лесхоз» демалыс орнын күл-қоқыстан арылтып, мұнтаздай етті. Жастардың тазалық жұмыстарына ынтасын арттыру мақсатында қоқыс жинауды квест форматында ұйымдастырылып, «Green RUN» акциясы өз жеңімпаздарын анықтады.

Акцияға қатысушылардың көңіл-күйі сергек болуы үшін ұйымдастырылған қызықты ойындар мен тапсырмалар сенбілікке мерекелік рең берді.

«Таза Қазақстан» акциясы аясында шаралар легі өз жалғасын таппақ. Акция аясында Атырау қаласы тұрғындары арасында қатты тұрмыстық қалдықтарды сұрыптауды ұйымдастыру; Атырау қаласы көпқабатты үй тұрғындарының арасында ауланы көгалдандыруды насихаттаушы «Таза аула, таза қала»; Қала аумағында «Мекенім-жасыл орманым» және «Бұл менің ағашым»; «Әр отбасыдан бір ағаш», «Әр сәбиге бір ағаш» акцияларын ұйымдастыру; «Жер – біздің ортақ үйіміз» ұранымен жастар арасында «Экотолқын» фестиваль мен экологиялық-туристік жорықтар өткізу жоспарланған.