Заң жобасының жеке бабы жануарларды өлтіру және олардың өлекселерімен жұмыс істеу ережелеріне арналған. Атап айтқанда, жануарларды өлтіру мүмкін болған жағдайлар, осы процедураны жүргізу кезінде, оның ішінде ветеринария саласындағы ұлттық заңнама талаптарын сақтай отырып, міндетті талаптар анықталған.
«Бұдан басқа, заң жобасында жекелеген санаттағы жануарларды: мәдени ойын-сауық мақсаттарында; эксперименттік (зертханалық) жануарларды; үй жануарларын; қараусыз және қаңғыбас жануарларды ұстау және қарау кезіндегі талаптар айқындалған. Сондай-ақ, осы саладағы қоғамдық бақылау институты қарастырылған. Жануарларды ұстау саласында «қоғамдық инспекторлар» ұғымын енгізу ұсынылады. Жануарларға қарау саласында қоғамдық бақылау жүргізудің неғұрлым егжей-тегжейлі тәртібін уәкілетті орган айқындайтын болады. Жергілікті атқарушы органдарға жануарларға арналған баспаналардың қызметін ақпараттық қамтамасыз етуді, жануарларды иелеріне беруге бағытталған әлеуметтік жарнаманы, жоғалған жануарлардың иелерін іздеуді және үй жануарларын биостерилизациялау қажеттілігі туралы хабарлауды ұйымдастыру құзыреті беріледі», - деді салалық ведомство өкілі.
Егер жануарлардың иелері қажетті жағдай жасай алмаса, онда олар биостерилизацияны қамтамасыз етуі керек. Иелер үй жануарларын 2023 жылдың 1 қыркүйегінен бастап ақылы негізде чиптеуі керек. Сондықтан жануарларды кезексіз есепке алуға уақыт жеткілікті.
«Жануардың өмірі, денсаулығы және саулығы үшін иесінің жеке жауапкершілігі, оның ішінде әкімшілік (қылмыстық жазаланатын іс - әрекет белгілері жоқ жануарларға қатыгездікпен қарағаны үшін) және қылмыстық жауаптылық (жануардың өліміне әкеп соққан құқық бұзушылық үшін жаза қатаңдатылды – 120-дан 200 АЕК-ке дейін, ал қайталап бұзған кезде - 1 000 АЕК-ке дейін немесе бір жылға дейін бас бостандығынан айыру) көзделген. Бүгін назарларыңызға ұсынылған заң жобасы жануарларға қатысты жағымсыз көріністерге тосқауыл қояды. Мұндай көріністерге, атап айтқанда, иттермен күрес, анестезиясыз ветеринариялық операциялар жүргізу, жануарларды жазасыз өлтіру, жануарларды шаршатуға алып келу және оларға уақтылы көмек көрсетпеу, адамгершілікке жатпайтын аулау, жануарлардың еті мен майын пайдалану жатады», - деді спикер.
Заң жобасы ережелерін іске асыру үшін Қылмыстық кодекске; «Әкімшілік құқық бұзушылық туралы» Кодекске;«Жергілікті мемлекеттік басқару және өзін-өзі басқару туралы»,«Ветеринария туралы»,«Жануарлар дүниесін қорғау, өсімін молайту және пайдалану туралы» Заңдарға өзгерістер мен толықтырулар енгізу талап етіледі.
