Қазақстандық экспорттаушылар Бакуде $38 миллионға келісімшарт жасасты

ҚР-ның 23 өндірушісі әзербайжандық іскер топтарға өздерінің экспорттық мүмкіндіктерін таныстырды. Компаниялар тамақ, химия және мұнай-химия салаларын, фармацевтиканы, металл өңдеу мен металл прокатын, Машина жасауды, құрылыс материалдарын өндіруді, IT-саланы қамтиды. Қазақстандық кәсіпорындардың ішінде экспорттық акселерация бағдарламасына қатысушылар бар. Әзірбайжан тарапынан қазақстандық бизнеспен ынтымақтастыққа мүдделі 100-ден астам компания қатысты.

Қазақстан Республикасының Әзербайжан Республикасындағы Елшісі Сержан Әбдікәрімов сауда-экономикалық миссияның ресми бөлігін аша отырып, елімізде өткен конституциялық референдумның мәні туралы айтып берді, оның қорытындылары экономика мен ұлттық кәсіпкерлікті дамытуға, экономикада ашық және әділ ойын ережелерін қалыптастыруға ықпал ететін болады.

Елші үш онжылдық ішінде «екіжақты және көпжақты ынтымақтастық саяси, сауда-экономикалық, энергетикалық, транзиттік-көлік, ауыл шаруашылығы, мәдени-гуманитарлық және басқа да салаларда жүйелі және көпжоспарлы сипатқа ие болғанын» хабарлады.

«QazTrade» АҚ Бас директоры Азамат Асқарұлы қазіргі жағдайда екі елдің ынтымақтастығы жаңа деңгейге көтеріліп жатқанын хабарлады.

- Соңғы жылдары әлемде үрдіс өңірлік сауданың пайдасына қалыптасуда. Каспий маңы өңірінде, бірінші кезекте, Әзірбайжан мен Қазақстанның өзара сауданы арттыру үшін зор әлеуеті бар. Оның үстіне, қазір Еуропадан Азияға транзиттік аумақ ретінде екі елдің де рөлі күшеюде және біз өзіміздің ішкі өзара іс - қимылымызды тек транзиттерлер ретінде ғана емес, экономикалық әріптестер ретінде де тереңдете аламыз және тереңдете беруге тиіспіз, - деп атап өтті Асқарұлы.

Ағымдағы жылдың басынан бері біздің Каспийдегі теңіз сауда порттарымыз арқылы 2021 жылдың ұқсас кезеңімен салыстырғанда екі есе көп жүк тасымалданды. Ағымдағы жылдың соңына дейін ТХКБ маршруты бойынша тасымалдау көлемі алты есеге артады деп күтілуде.

QazTrade басшысы бүгінгі таңда 80-нен астам қазақстандық компания өз өнімдерін Әзірбайжанға тұрақты экспорттаушылар болып табылатынын атап өтті. Бұл ретте Қазақстаннан $272 млн сомасына 105 тауар позициясы бойынша экспортты, оның ішінде металлургия өнімдері, тамақ өнімдері мен сусындар, машина жасау және химия салаларының өнімдерінің өсуін ұлғайту әлеуеті байқалуда.

СЭМ шеңберінде қазақстандық тауар өндірушілер үшін екі елдің ұлттық компаниялары мен іскер топтарының қатысуымен В2В форматында екіжақты келіссөздер, Әзірбайжан Республикасының ірі сауда желілерімен және дистрибьюторларымен кездесулер ұйымдастырылды.

Нәтижесінде жалпы сомасы $38 млн-нан асатын 8 экспорттық келісімшартқа қол қойылды.

В2В қазақстандық және әзірбайжандық кәсіпкерлердің келіссөздері 9 маусымға дейін жалғасады.

Қазақстан Республикасының басқа елдердегі Сауда-экономикалық миссияларының ұйымдастырушысы ҚР Сауда және интеграция министрлігінің «Qaztrade» АҚ болып табылады. «QazTrade» АҚ - экспорттаушыларға мемлекеттік қолдау шараларын көрсетудің бірыңғай операторы.

Анықтама:

Қазақстан мен Әзірбайжан арасындағы тауар айналымы 2021 жылы $332,2 млн құрады, бұл өткен жылдың сәйкес кезеңімен салыстырғанда 3 есе жоғары ($109,2 млн).

Қазақстаннан Әзербайжанға Экспорт 2021 жылы 3,4 есеге өсті және $287,9 млн.құрады, Қазақстаннан Әзірбайжанға экспорттың негізгі тауарлары: арнайы мақсаттағы жүзу құралдары, электр темір жол локомотивтері, мұнай өнімдері, астық, болат прокаты болып табылады.

Әзірбайжаннан Қазақстанға импорт 2021 жылы 77,3%-ға өсті және $44,4 млн-ды құрады, Әзірбайжаннан Қазақстанға импорттың негізгі тауарлары пропилен және этилен полимерлері, жаңғақтар, жемістер, тоқыма материалдарынан жасалған қаптар мен қаптама пакеттер, оқшауланған сымдар, кабельдер болып табылады.

Қазақстан мен Әзірбайжан арасындағы тауар айналымы 2022 жылғы қаңтар-наурызда $99,3 млн құрады, бұл өткен жылдың сәйкес кезеңімен салыстырғанда 4 есе жоғары ($24,8 млн).

2022 жылғы қаңтар-наурызда Қазақстаннан Әзірбайжанға экспорт $71,4 млн. құрады, Әзірбайжаннан Қазақстанға импорт $ 27,8 млн. құрады.

СЭМ қатысушыларының тізімі