5 маусымда Қазақстанда республикалық референдум өтті. Референдум мемлекеттік жүйені жаңғырту мен демократияландыру барысында тарихи аса маңызды қадам болды. Екінші республиканың негізін қалайтын дауыс беру рәсімі өтті.
«Республикалық референдум» туралы ҚР заңының 31-бабының 2 және 3 тармақтарына сәйкес референдум өткізілді деп танылды және ҚР Конституциясына өзгерістер мен толықтырулар енгізу мәселесі жөнінде шешім қабылданды деп есептеледі. «Конституцияға өзгерістер мен толықтырулар енгізу туралы» ҚР заңының 3-бабына сәйкес заң алғашқы жарияланған күннен бастап, қолданысқа енгізіледі. Бұл туралы Орталық коммуникациялар қызметі алаңында ҚР Әділет вице-министрі Алма Мұқанова мәлімдеді.
«Орталық референдум комиссиясының есептеулері бойынша референдумға 8 млн жуық адам немесе халықтың жалпы санының 68,05% қатысты. Референдумға бір ғана сұрақ шығарылды. Референдумға шығарылған мәселе бойынша оң шешім қабылдауға 6 млн астам адам дауыс берген, бұл 77,18%. Сондай-ақ Конституцияға енгізілетін өзгерістер мен толықтыруларды қабылдауға қарсы дауыс бергендер 18,66% құрады. Бұл шамамен 1,5 млн адам. Яғни, қолдау деңгейі жоғары болғанын көріп отырмыз. Бірақ 20% келіспегендер де бар. Бюллетеньдердің 2,5% жарамсыз деп танылды», - деді спикер.