Бұл әрекеттердің мақсаты көшелерде үрей мен халық арасында қорқынышты туғызу, оның ішінде жалған ақпарат тарату арқылы елдегі жағдайдың тұрақсыздануына қол жеткізу болды.
«Қиратулардың қатысушылары полиция қызметкерлеріне, әскерилерге және қарапайым адамдарға шабуыл жасады, жолдардың жүру бөлігін жауып тастап, көлік құралдарын өртеді, азаматтарды қорқыту арқылы жаппай тәртіпсіздіктерге қатысуға шақырды, тонаулар жасады. Қылмыскерлер қару дүкендерін тонады, ұрланған қарулардың көмегімен бейнежазба камераларын жойды. Қарулы қылмыскерлер Алматы, Қызылорда, Тараз, Талдықорған, Шымкент және Атырау қалаларындағы әкімдік, полиция ғимараттарына, Президенттің резиденциясына, телемұнараға, дүкендер мен өзге де объектілерге шабуыл жасады. Қоғамдық қауіпсіздік пен тәртіпті қамтамасыз етуді бұғаттау мақсатында және жауынгерлік қаруларды жымқыру үшін олар полиция органдары мен Ұлттық қауіпсіздік комитетінің ғимараттарына ұйымдасқан және жақсы жоспарланған шабуылдар жасады. Олар мемлекеттік және жеке мүліктерді жою арқылы тәртіп сақшыларын және қарапайым азаматтарды қорқыту жолымен өз іс-әрекеттерін тоқтатпады», - деді полковник.
Қаңтар оқиғалары кезінде ел бойынша 1 151 азамат жарақат алып, 3 998 қоғамдық тәртіп қызметкерлері зардап шекті. Нәтижесінде 100 млрд теңгеден астам сомаға залал келтірілді, оның ішінде бизнес субьектілеріне 92 млрд теңге. Жүздеген ғимарат пен көлік құралы өртелді.
