Форумға қатысушылардың алдында ҚР Денсаулық сақтау министрі Ажар Ғиният құттықтау сөз сөйледі. Денсаулық сақтау министрлігінің басшысы ҚР Денсаулық сақтау министрлігі кәсіби сарапшылар қауымдастығымен ашық диалогта бола отырып, санаторий-курорттық бағыттың белсенді дамуын және осы саланың жаңа сапалы деңгейде қалыптасуын жақтайтынын атап өтті.
Бүгінгі таңда Қазақстанда әртүрлі профильдегі 160-тан астам шипажайлар мен курорттар бар, оның ішінде 10-ы балаларға арналған мамандандырылған шипажайлар. Министр саланың ғылыми-зерттеу және кадрлық әлеуетін жандандыру бойынша кешенді жұмыс жүргізу, уақыт шындығына сәйкес келетін нормативтік-құқықтық базаны әзірлеу, медициналық базаны нығайту және жаңа тиімді оңалту технологияларын енгізу, «өсу нүктелері» немесе бүкіл денсаулық сақтау жүйесі үшін үздік тәжірибелер орталығына айналатын неғұрлым перспективалы клиникалық шипажайлардың негізгі пулын анықтау қажеттігін атап өтті.
Сондай-ақ Қазақстан Республикасы Үкіметінің отырысында «Курортология және медициналық оңалту ғылыми-зерттеу институтын» құру талқыланды.
«Сонымен қатар Мемлекет басшысының тапсырмасы бойынша «Ауылдық денсаулық сақтауды жаңғырту» Ұлттық бағдарламасы жүзеге асырылып, оның шеңберінде 655 МСАК нысандарын салу жоспарлануда, онда медициналық пункттер мен ФАП деңгейінде физиотерапия кабинеттерін, ал дәрігерлік амбулаториялар деңгейінде ЕДШ кабинеттерін ашу көзделген.Сонымен қатар, медициналық оңалту бөлімдері ашылатын 32 ауданаралық орталық аурухананы жаңғырту жоспарлануда. Бұл үшін елімізде санаториялық-курорттық индустрияны дамытудың орасан зор әлеуеті бар, оны ел тұрғындарының денсаулығы үшін жүзеге асыру қажет», - деді Денсаулық сақтау министрлігінің басшысы құттықтау сөзінде.
Форумға қатысушылар, соның ішінде Қазақстан, Ресей, Әзірбайжан, Грузия, Қырғызстан, Чехияның қалпына келтіру және оңалту медицинасының жетекші өкілдері өз елдеріндегі саланың дамуы туралы көзқарастарымен бөлісті, сондай-ақ курортология мен оңалтудың өзекті мәселелері бойынша шеберлік сыныптарын өткізді. Форум аясында «Шипажай-2022» атты VII Халықаралық ғылыми-практикалық форумының лауреаттары марапатталды.
