World Cafe интерактивті форматында өткен диалог алаңына ҚР Парламентінің, үкіметтік емес сектордың, сондай-ақ сыртқы істер, денсаулық сақтау, еңбек және әлеуметтік қорғау, әділет, ұлттық экономика, экология, геология және табиғи ресурстар министрліктері сияқты мемлекеттік органдардың өкілдері белсенді қатысты.
ҚР Сенатының депутаты, Алматы қаласы мүгедектер ұйымдары қауымдастығының төрағасы Ләззат Қалтаева қатысушыларды құттықтап, Қазақстанда азаматтық қоғам мен мемлекет диалогының дамуы геосаяси, экономикалық, экологиялық және әлеуметтік сын-қатерлер кезеңінде жаңа дәуірге аяқ басқанын атап өтті.
«Азаматтық қоғамның сипаты, құрылымы, оның ықпал ету саласы өзгеруде. Бұл өзгерістердің дамуының маңызды факторы цифрландыру, әлеуметтік желілер арқылы көптеген ақпаратқа қол жеткізу, әр адамның өзінің жеке стендін интернетте пайдалану мүмкіндігін алу, демек, жеке адам мен қоғам және мемлекет арасындағы қашықтықты қысқарту болып табылады. COVID-19 және онымен байланысты мәжбүрлі оқшаулау, содан кейін қаңтар айындағы оқиғалар адамдарға бұрын азаматтық қоғамның бөлек бір бөлігі болған ҮЕҰ-ға жақындауға мүмкіндік берді және бұл қолжетімділік бүкіл әлемде және біздің елде азаматтық белсендіктің дамуына әсер етті», - деді спикер.
Қазақстан Республикасы Ақпарат және қоғамдық даму министрлігі Азаматтық қоғам істері комитетінің төрағасы Мадияр Қожахмет бүгінде мемлекет ҮЕҰ-мен бірге жұмыс істейтін негізгі бағыттарды, атап айтқанда, жергілікті өзін-өзі басқару мен азаматтық қоғамды дамыту тұжырымдамасын атап өтті:
«2023 жылы азаматтық қоғаммен түрлі бастамаларды талқылау жоспарлануда, оның ішінде маңызды ұсынымдар ескеріле отырып, оларды іске асыруға тек Ақпарат және қоғамдық даму министрлігі ғана емес, барлық мемлекеттік органдардың министрліктері де тартылатын болады», - деп атап өтті М.Қожахмет.
Конрад Аденауэр атындағы қордың Қазақстандағы өкілдігінің директоры Йоханнес Рай мырза «Халық үніне құлақ асатын мемлекет» тұжырымдамасын талқылау мен диалогтың маңыздылығына тоқталып, Германиядағы мемлекет пен жұртшылық арасындағы өзара іс-қимылды дамыту тәжірибесімен бөлісті, қатысушыларды белсенді пікір алмасуға ынталандырды.
АҚДҚ атқарушы директоры Жәмилә Асанованың айтуынша, Қазақстанның коммерциялық емес ұйымдарының көшбасшылары мемлекеттік органдармен диалогтың жаңа тетігін қалыптастыру қажет:
«Мемлекеттік органдар үшін, өз кезегінде, «жаңа жолмен» азаматтық қоғаммен сындарлы диалог құру да «Жаңа Қазақстанның» даму стратегиясын іске асыру кезінде басымдыққа ие болып, адамға бағдарланған тәсілге баса назар аударылады», - деп атап өтті.
