«Биыл зертханамызға өтінімдер көбірек түсе бастады. Біз бұл үрдісті Мемлекет басшысының жолдардың сапасын арттыру жөніндегі тапсырмасымен байланыстырамыз. Өз кезегінде тапсырыс берушілер мен мердігерлер құрылыс материалдарын сынау жұмыстарына көбірек көңіл бөле бастады. Сонымен қатар еліміздегі жалғыз салалық институттың зертханасы ретінде біз заманауи жабдықтар туралы хабардар бола отырып, барынша жаңа үлгілермен қамтамасыз етуге тырысамыз», – деп атап өтті Қазақстан жол ғылыми-зерттеу институтындағы сынақ зертханасының жетекшісі Мейрамгүл Қабдығалиева.
Зертхана жол ғылымының маңызды бөлігі саналады. Осы ретте автомобиль жолдарының сапасы, ең алдымен, нақты учаскелерде қолданылатын құрылыс материалдары мен технологияларға тікелей байланысты.
«Тіпті дұрыс салынған жолдың өзі жобалау кезеңінде компоненттер дұрыс таңдалмаса, бұзыла бастауы әбден мүмкін», – деп атап өтті М. Қабдығалиева.
Бүгінгі таңда «ҚазжолҒЗИ» АҚ зертханалары түрлі жол-құрылыс материалдары мен технологияларын сынақтан өткізіп жатыр. Аталған компоненттер қысым мен климаттық жағдайлардың әсерінен сапасы мен тұрақтылық сынды қасиеттері бойынша тексеріледі.
Жол-құрылыс материалдары мен жаңа технологиялардың бірыңғай базасын құру шеңберінде Қазақстан жол ғылыми-зерттеу институтының зертханасы жыл басынан бері отандық карьерлерден алынған сынамалар мен материалдарды зерттеп келеді. Институт бүгінгі дейін 151 жол-құрылыс материалын сынақтан өткізген: 90 тас және 10 құм материалдары, 12 қиыршық тас-құм қоспалары және басқа да компоненттер.
Аталған электрондық база Қазақстанның әртүрлі климаттық аймақтарында жол жабындарының құрылысы үшін пайдаланылатын материалдарды дайындау үшін қолайлы компоненттерді есепке алу және іздеу жұмыстарын жеңілдету мақсатында әзірленіп жатыр.
