Орталық коммуникациялар қызметінде өткен брифингте Ақпарат және қоғамдық даму министрлігі дін істері комитетінің төрағасы Ержан Нүкежанов еліміздегі дін саласындағы жалпы жағдай туралы баяндады. Оның айтуынша, былтыр қабылданған дін саласындағы мемлекеттік саясатты іске асыру жөніндегі 2021-2023 жылдарға арналған кешенді жоспар аясында үш бағыт бойынша жұмыстар жүргізілуде: мемлекет дамуындағы зайырлылық қағидаттарын нығайту; мемлекет пен конфессиялар арасындағы өзара түсіністікті қамтамасыз ету; дінді деструктивті мақсатта пайдалануға жол бермеу.