Астықты қайта өңдеу саласында жыл сайын 5 млн тоннадан астам астық өңделеді. Сонымен қатар астықты терең өңдеу бағыты дамуда.
«Елде қуаттылығы 500 мың тоннадан асатын 3 кәсіпорын жұмыс істейді, олар крахмал, глютен, сірне және биоэтанол өндіреді. 2025 жылы 29 мың тонна жүгері крахмалы, 28 мың тонна бидай крахмалы, 13 мың тонна глютен, 82 мың тонна сірне және 21 мың тонна биоэтанол өндірілді. Етті қайта өңдеу саласында бүгінде жалпы қуаттылығы 450 мың тоннаға жуық 210 кәсіпорын жұмыс істейді. Сүт өнеркәсібінде жалпы қуаттылығы шамамен 2,7 млн тонна болатын 180 қайта өңдеу кәсіпорны бар. Осы бағыттардағы өндірістік қуаттардың кеңеюі қайта өңделген өнім көлемін арттыруға және ауыл шаруашылығы шикізатын пайдалану тиімділігін көтеруге мүмкіндік береді», – деді вице-министр.
Ең перспективалы бағыттардың бірі – астықты терең өңдеу. Алдағы жылдары қайта өңдеу көлемін айтарлықтай арттыратын 6 ірі инвестициялық жобаны іске асыру жоспарда бар.
2028 жылға дейін жалпы қуаттылығы жылына 5,8 млн тонна болатын жаңа астықты терең өңдеу өндірістерін іске қосу жоспарланған. Бұл жобаларға шамамен 1,9 трлн теңге инвестиция тартылып, нәтижесінде 3,3 мыңнан астам жаңа жұмыс орны ашылады. Өнім ассортименті аминқышқылдары, сироптар, витаминдер және басқа да жоғары технологиялық өнімдер есебінен кеңейеді.
Сонымен қатар майлы дақылдарды қайта өңдеу саласында 94 млрд теңге сомасына 13 жоба іске асырылады. Сүт саласында 41 млрд теңге сомасына 12 жоба іске қосылып, қосымша 165 мың тонна қайта өңдеу қуаты енгізіледі.
