Ауқымды мемлекеттік бағдарламалардың орнына ұлттық жобалар жүзеге асырылады. Бұл туралы Стратегиялық жоспарлау және реформалар агенттігінің төрағасы Қайрат Келімбетов ОКҚ-да өткен брифингте еліміздің 2025 жылға дейінгі дамуының Ұлттық жоспарын таныстыру барысында мәлімдеді. Оның айтуынша, көптеген мемлекеттік бағдарламалар ұжымдық жауапсыздық тудырды. Ұлттық жобалардың мәні тұжырымдалған мақсаттардың нақтылығы, оларға қолжеткізу үшін ресурстар мен мүмкіндіктердің жеткіліктілігі, жеке жауапкершілік, ең бастысы – азаматтарға бағдарланған. Яғни, әрбір осындай жоба өмір сүру сапасын жақсартуға және Қазақстан халқының әл-ауқатын арттыруға бағытталады.