Оның айтуынша, еріген қар суларының едәуір көлемі лимандар мен көл жүйелеріне экологиялық жіберілімдерге бағытталды. Бұл бірқатар өңірдегі экологиялық жағдайды тұрақтандыруға мүмкіндік берді.
«Мысалы, Тасөткел су қоймасынан Созақ ауданына 1 млрд текше метрден астам су жіберілді. Ертіс бассейнінде жайылма шалғындарды суландыру үшін 9 сәуір мен 5 мамыр аралығында 5,4 млрд текше метр су бағытталды. Бүгінде Павлодар облысындағы Ертіс өзенінің жайылмасын су басқан аумақ көлемі 297 мың гектардан асты, бұл жалпы аумақтың 88%-ына сәйкес келеді. Балқаш көлін толықтыру жұмыстары жалғасуда, оған 2025 жылғы қазаннан ағымдағы жылдың сәуіріне дейін Қапшағай су қоймасынан 3,7 млрд текше метр су жіберілді, бұл Балқаш көліндегі су деңгейін 29 сантиметрге көтеруге мүмкіндік берді», – деді спикер.
Ағымдағы және алдағы жағдайларды бағалауға көше отырып, вегетациялық маусым 2025 жылғы қуаңшылық салдарының ықпалымен өтуі мүмкін. Talsim-NG гидрологиялық моделінің есептеулеріне сәйкес, ағын қалыптасатын аймақтардағы ылғал қоры біркелкі қалпына келмеген: орта таулы аймақтарда жинақталу салыстырмалы түрде қанағаттанарлық, ал биік таулы аймақтарда тапшылық сақталуда.
Өзен бассейндері бөлінісінде вегетациялық кезеңге сулылық мынадай деңгейде болжануда: Сырдария өзені бассейнінде шектес мемлекеттер аумағындағы су қоймаларының толымдылығы өткен жылдың осы кезеңімен салыстырғанда 1,6 млрд текше метрге аз. Осыған байланысты, жазғы кезеңде аталған су қоймалары жинақтау режимінде жұмыс істейтінін ескере отырып, Қазақстан аумағына келетін ағын су көлемі көпжылдық орташа норманың 70%-ын құрайды деп болжануда, бұл аз сулы жағдайларға сәйкес келеді және бассейннің орта және төменгі ағысында су ресурстары тапшылығының елеулі тәуекелдерін қалыптастырады.
Ұқсас жағдай Шу және Талас өзендері бассейндерінде де байқалады. Киров су қоймасы 75%-ға толған, бұл өткен жылмен салыстырғанда 68 млн текше метрге аз. Орто-Токой су қоймасы 78%-ға толған, бұл да өткен жылғы деңгейден 41 млн текше метрге төмен. Тиісінше, Талас өзені бассейнінде сулылық нормадан төмен болады деп күтілуде. Шу өзені бассейнінде ағын норманың 50-75%-ы шегінде болатын орташа аз сулы режим болжануда. Жалпы, аталған бассейндер үшін вегетациялық маусым бойы тұрақты төмен су қамтамасыз етілуі тән.
Ал, Іле өзені бассейнінде қалыпты және жоғары ағын режимі болжануда. Ағын көлемі көпжылдық нормадан жоғары және оның шегінде болады деп күтілуде (30-60% артық), бұл орташа мол сулы гидрологиялық режимге сәйкес келеді. Осылайша, 2026 жылғы вегетациялық кезең Жамбыл, Түркістан және Қызылорда облыстарында су тапшылығы тәуекелімен өтуі мүмкін.
